Jang Bapontar!!! Di Rumah Jo Dang

Tabea...

Hari ini kita mulai lagi batulis di ini blog, padahal  kasiang so pe lama nda pake. Terakhir ba tulis disini taong lalu katu wkwk pe lama mate.

Jadi diawal taon ini torang di Indonesia ada hebo masalah virus korona ato COVID-19. Memang ada heboh sekali karna memang banyak ada mati di Indonesia karna ini virus. Manado jo sandiri dikonfirmasi 2 orang posotif korona aduh ehh, bayangkan jo itu ta harap-harap orang-orang Manado kabal karna banyak ba minum captikus. 

Tau nda sekarang torang di Indonesia so 2 minggu ada tinggal dirumah, belajar di rumah, bakerja di rumah kong dapa larang kaluar-kaluar ato baba kumpul ba karlota ehh maksudnya baba kumpul deng banyak orang.

Memang dapa rasa depe menderita di rumah selama 2 minggu ini, apaleh kita yang sementara ba susun skripsi so jaga dapa tanya kapan klar trus mar ta cuman jajawab mo klar kalu tu virus so klar leh wkwkwk. Otuhai ehh tu anak-anak skolah kasiang libur padahal dorang pe UN mar kak presiden leh so se ilang tu UN taon ini pe bahagia kang yang mo lulus taon 2020 ini auto lulus nda ujian. Kage kata kang deng skripsi kak presiden se ilang odoh auto dapa gelar so nda usa mo ba kumpul doi bayar dosen ehh maksudnya doi konsumsi yah wikwikwikiwk

Mar terlepas dari itu komang torang samua dapa lia torang biasa-biasa mar torang dalam hati so kuatir, mar kalu kita sih ta pe kuatir ta serahkan pa Tuhan Yesus eaaaa. 

Ta mo bilang neh pa ngoni tu hari minggu baru-baru weta torang satu keluarga ba ibadah dalam rumah karna sinode GMIM so ada surat edaran bagitu mar sesuai no katu deng edaran pemertintah leh.

pokoknya ta cuman mo bilang pa ngoni yang sementara berjuang semangat jangan lupa berdoa kong berusaha kong nda usa bakaki gatal baba pontar karna libur, kalu pemerintah ada suruh tinggal di rumah, berarti itu so for torang pe kebaikan jang karna libur kong sokasana kamari ehh:v
Sekali leh tolong reken taati tu pemerintah pe aturan ini jang dulu bakasana kamari, jangan PANDANG ENTENG tu masalah virus ini ato ngoni kira ini cuman baku sedu, adoh kasiang ehh ini pandemi komang cari tau sadiri di internet apa itu pandemi.
So pe banyak korban berjatuhan karna ini virus jadi jang ngana kira karna ngana  banyak minum captikus kong kebal ngana pe badan terhadap ini virus ehh. TOLONG ehh kalu boleh tinggal dulu dirumah kong tre ba beking tu hal-hal bae yang kreatif rupa kita ini ba beking tulisan di blog biar nda talalu berguna for ngoni yang babaca mar ta pe hati senang deng kapan leh toh ngoni tinggal dirumah jadi pahlawan.
#dirumahjo